Nú er regntími hér í Malaví og því fylgir daglegt rafmagnsleysi. Fæstir innfæddir hafa rafmagn og þó þeir hafi það nota þeir það ekki til að elda þar sem það er of dýrt. Í staðinn elda þeir enn á opnum eldi. Þar sem rafmagnið fer oftast af rétt fyrir kvöldmat lendum við oft í vandræðum með að elda kvöldmatinn. Nágrannarnir okkar furða sig á því af hverju við erum svona ósjálfbjarga án rafmagns og af hverju við kveikjum ekki upp eld til að elda eitthvað.

Þeir voru lengi ad skilja það að við höfum aldrei eldað á opnum eldi, bara notast við grill. Nú eru þeir farnir að koma með mat til okkar ef þeir sjá að það er rafmagnslaust svo við fáum nú eitthvað að borða. Regntímanum fylgir líka mikil fjölgun á skordýrum. Þar sem við erum ekki vanar skordýrum í svo miklu mæli erum við farnar að fjárfesta í skordýraeitri í miklu magni. Innfæddir skilja ekki af hverju við spreyjum a allt kvikt þar sem þeim finnst aðeins ástæða til að losa sig við skordýr sem bíta. Við forðumst að opna glugga eða dyr eftir myrkur annars fyllist allt af skordýrum. Það er líka orðinn fastur liður að hafa með sér skordýraeitur ef farið er á kamarinn eftir myrkur. Nágrannarnir hafa hlegið mikið að okkur þegar við stöndum þrjár og tökum okkur til, spreyjum kamarinn og eltum uppi hvern kakkalakkann eftir öðrum.

Vid hofum haft þéttskipaða dagskrá síðustu fjóra mánuðina, bæði vinnu og ferðalög. Við höfum ferðast talsvert um landið þvert og endilangt og farið að Malavívatni sem er algjor paradís med hvítar strendur. Jólum og áramótum eyddum við síðan í Suður-Afríku. Að okkar mati er Suður-Afríka eitt best geymda leyndarmál fyrir ferdalanga á öllum aldri. Það var einnig kærkomið frí fyrir okkur frá því að búa í þriðja heims landi þar sem allt er mun vestrænna þar. Við fórum bæði til Jóhannesarborgar og Höfðaborgar, skoðuðum heimili Nelson Mandela, Robben Island þar sem hann var í fangelsi, Soweto fátækrahverfi, Góðrarvonarhöfða, Table Mountain og auðvitað strúta og afrísku mörgæsirnar.

Næsta mánuðinn munum við taka að okkur nýtt verkefni sem felur í sér að sinna HIV-sjúklingum (nokkurs konar heimahjúkrun) og greina og meðhöndla munadarlaus börn í sýslunni þar sem við búum. Við munum segja betur frá því í næsta mánuði.

Fríða Björk Skúladóttir
Ásta Rut Ingimundardóttir
Bjarnheiður Böðvarsdóttir