Sr. Svavar Alfreð Jónsson

Sóknarprestur í Akureyrarkirkju

Þegar þessar línur eru ritaðar á ég 45 aldursár að baki. Er fæddur og uppalinn á Akureyri og held með KA. Þór ella. Stúdent frá MA 1980 og las guðfræði við HÍ og í Þýskalandi. Lauk embættisprófi 1986. Á árunum 1986-1995 var ég sóknarprestur hjá góðu fólki í Ólafsfirði. Þar getur verið hjarnbjart í svartamyrkri. Á árunum 1992 – 1993 stundaði ég framhaldsnám í kennimannlegri guðfræði við háskólann í Göttingen í Þýskalandi með styrk Lútherska heimssambandsins. Er eiginlega eilífðarstúdent og verð sennilega aldrei fullþroska. Nokkra mánuði var ég héraðsprestur Eyfirðinga en frá 1995 hef ég verið prestur í Akureyrarkirkju. Er sumsé kominn heim á hina gömlu og margblessuðu Akureyri.

Konan mín heitir Bryndís og er Björnsdóttir. Svarfdælskt fljóð og sérkennari að mennt. Við eigum þrjú börn. Fróm og fögur, eins og segir í sálminum.

Ég les mikið og margt og er með svona tíu bækur í takinu í einu. Sit oft við tölvuna og skrifa. Málið heillar mig og ég lít upp til þeirra sem hafa á því tök og lag. Lem saman kvæði sjálfur en meira af löngun en getu. Mér finnst líka gaman að horfa á bíómyndir og hlusta á tónlist. Ég syndi mikið og tel það bót flestra meina. Ferðalög eiga vel við mig. Ég skrepp á barbíjeppanum mínum með veiðistöngina út í Fjörður, hjóla um Þýskaland, spila trivíal við konu og börn í sumarhúsum, sötra rauðvín úti á Ítalíu eða hlusta á haustsöngva lómsins við Vestmannsvatn. Allt jafn yndislegt. Ég hef nautn af því að elda góðan mat og gera honum skil í samfélagi vina.

Forsjónin hefur verið mér afskaplega hliðholl og ég hef engin efni á öðru en að vera þakklátur maður.

Blogg Svavars Alfreðs