Mig vantar upplýsingar um anglíkönsku kirkjuna sem á rót að rekja til Hinriks VIII Englandskonungs, ég veit að hún er sprottin úr reformertu kirkjunni sem er stundum kennd við Kalvín en ég veit ekki mikið meira, gætuð þið frætt mig um þetta.

Anglíkanska kirkjan (Enska biskupakirkjan, enska Þjóðkirkjan) er nefnd á ensku The Church of England.

Á 16. öld (á dögum Hinriks 8) losaði Enska kirkjan sig undan valdi páfans í Róm, en hélt að öðru leyti að mestu þeirri fornu skipan, trúarjátningu og helgisiðum, sem katólska kirkjan var reist á. Við guðsþjónustuna er aðallega fylgt bænabók/handbók allrar þjóðarinnar, The Book of Common Prayer, sem samin var og fyrirsögð árið 1549.

Nú á tímum er komin ný handbók við hlið hinnar sígildu, Common Worship, sem er frá árinu 2000.

Þjóðkirkjan lýtur drottningunni, sem kallast verndari trúarinnar og kirkjunnar (Protector of the Church). Erkibiskupinn í Canterbury (Kantaraborg) annast krýningu hátignarinnar (drotttningar/konungs) og mælir svo fyrir að hátignin og allir aðrir í bresku konungsfjölskyldunni þjóni kirkjunni á lögskipulegan hátt með ráðum forsætisráðherrans. Kirkjan er þannig falin hátigninni og allir prestar Þjóðkirkjunnar sverja henni trúnaðareið sem yfirboðara sínum.

Enska biskupakirkjan er tengd ríkinu með því, að erkibiskuparnir í Canterbury og York (Jórvík) eiga ásamt 24 biskupum sæti í Lávarðadeild beska þingsins. Það tryggir leiðtogum kirkjunnar úrkosti til að láta í ljós og gera valdsmönnum þjóðarinnar kunn sjónarmið sín um siðferði og framkomu stjórnvalda í stjórnmálum og félagsmálum með því klerklega og trúarlega valdi, sem Þjóðkirkja Englands ræður yfir. Hins vegar hefur kirkjan ekki lagalegan rétt til að eiga fulltrúa í neðri deild þingsins.

Kirkjan er landfræðilega skipulögð í tvö erkibiskupsdæmi (Yorkerkibiskupsdæmi og Kantaraborgarerkibiskupsdæmi) og 43 biskupsdæmi.

Erkibiskupinn í York ræður yfir 14 erkibiskupsdæmum en sá í Kantaraborg ræður yfir 29 biskupsdæmum. Hvert biskupsdæmi skiptist í prófastsdæmi og hvert prófastsdæmi í kirkjusóknir, sem eru alls um 14.500. Erkibiskupinn í Kantaraborg er titlaður sem erkibiskup alls Englands.

Enska þjóðkirkjan á miklar lendur og eignir sem standa undir rekstri hennar ásamt þeim fjármunum sem safnaðarfólk gefur og tekjur vegna prestsverka, sem renna allar í sameiginlega sjóð.

Enska Þjóðkirkjan ræður yfir rúmlega 7000 skólum á ýmsum stigum í landinu.

Biskupsdæmi Evrópu nær yfir öll önnur lönd álfunnar, auk Marokkó, Tyrklands og Asíuríki fyrrum Sovétríkjanna.

Anglíkanska kirkjan er starfandi í 161 landi í veröldinni. Hún er býsna öflug í fyrrum nýlendum Breta. Innan vébanda þessarar kirkjudeildar eru um 100 milljónir manna.

Guðfræðilega standa íslenska Þjóðkirkjan og enska Þjóðkirkjan hlið við hlið. Afar náið og gott samstarf ríkir milli þessara kirkjudeilda. Árið 1996 var undirritaður svokallaður Porvoo sáttmáli milli Ensku biskupakirkjunnar í Bretlandi og Írlandi annars vegar og Lútersku kirknanna á Norðurlöndum og Eystrarsaltslöndum hins vegar (að Danmörku og Litháen undanskildum). Í þessum mikilvæga sáttmála er fjallað m.a. um gagnkvæma viðurkenningu á vígslu, menntun og embættisgengi klerkanna. Tveir íslenskir prestar hafa þegar starfað innan ensku biskupakirkjunnar undir þessum sáttmála.

Það er misskilningur, að halda því fram, að enska biskupakirkjan sé sprottin úr Reformertu kirkjunni sem er Kalvínsk. Aftur á móti er skoska Þjóðkirkjan (Church of Scotland) Kalvínsk. Enska biskupakirkjan og skoska Þjóðkirkjan eru býsna ólíkar kirkjudeildir og misjafnar guðfræðilegar áherslur liggja þar til grundvallar.