Er Jesús kletturinn eða Pétur postuli og hvernig þá?

Komdu sæl.

Klettur eða bjarg, eru myndlíkingar sem eru notaðar um Guð í Gamla testamentinu, en Jesú Krist í því Nýja. Klettur eða bjarg er líking um það sem er stöðugt og traust. Jesús sagði sögu um tvo menn sem byggðu hús sín á bjargi og sandi og þótti húsið á bjarginu hafa ólíkt betri grunn, heldur en hitt sem hrundi í fyrstu rigningum.

Guð er víða kallaður bjarg eða klettur í Gamla testamentinu, t.d. í 2. Samúelsbók 22.2-3. Þar segir: “Drottinn er bjarg mitt og vígi, hann er sá sem hjálpar mér. Guð minn er hellubjarg mitt, þar sem ég leita hælis.”

Í 2. Mósebók 17.6 er sagt frá því að þegar Ísraelsmenn voru í eyðimörkinni og að deyja úr þorsta. Þá benti Guð Móse á klett einn þar sem spratt fram vatn, þegar Móse klappaði á klettinn. Vatnið úr klettinum bjargaði lífi þeirra.

Páll postuli túlkar þessa sögu í Nýja testamentinu og segir: “Þeir drukku af hinum andlega kletti sem fylgdi þeim. En kletturinn var Kristur.” (1. Kor. 10.4)

En líkingin um klettinn er ekki aðeins notuð um Guð. Samkvæmt Matteusarguðspjalli nefndi Jesús Símon vin sinn Pétur, en nafnið Pétur þýðir klettur. “Og ég segi þér: Þú ert Pétur, kletturinn, og á þessum kletti mun ég byggja kirkju mína, og máttur heljar mun ekki á henni sigrast.” Matt. 16. 18.

Þannig er klettsmyndin notuð bæði um Pétur og Jesú Krist í Biblíunni og hvoru tveggja er rétt.