Góðan daginn.

Svo er mál að mig vantar jólaguðspjallið til að fara með á kristlegri samkomu.
Bið um að fá ábendingu um hvar ég nálgast jólaguðspjallið eða mánski er hægt að finna það á vefnum ykkar.

Með þökk og kveðju,
Pétur Guðmundsson

Sæll Pétur

Jólaguðspjallið finnur þú í rafrænu formi á vef kirkjunnar með lestrum aðfangadags jóla. Þú getur einnig flett upp á vef Hins íslenska Biblíufélags, www.biblian.is Þar velur þú neðst í hægra horni upphafssíðunnar, Biblían á netinu, og jólaguðsspjallið finnur þú síðan í Lúkasarguðspjalli, 2.kafla versunum 1-14.

Einnig getur þú flett upp á jólaguðspjallinu ef þú hefur aðgang að Nýja testamentinu eða Biblíunni og þá finnur þú það á þeim stað sem áður var nefndur, í Lúkasarguðspjalls, 2.kafla, versin 1-14:

En það bar til um þessar mundir, að boð kom frá Ágústus keisara, að skrásetja skyldi alla heimsbyggðina. Þetta var fyrsta skrásetningin og var gjörð þá er Kýreníus var landstjóri á Sýrlandi. Fóru þá allir til að láta skrásetja sig, hver til sinnar borgar. Þá fór og Jósef úr Galíleu frá borginni Nasaret upp til Júdeu, til borgar Davíðs, sem heitir Betlehem, en hann var af ætt og kyni Davíðs,að láta skrásetja sig ásamt Maríu heitkonu sinni, sem var þunguð. En meðan þau voru þar, kom sá tími, er hún skyldi verða léttari.Fæddi hún þá son sinn frumgetinn, vafði hann reifum og lagði hann í jötu, af því að eigi var rúm handa þeim í gistihúsi. En í sömu byggð voru hirðar úti í haga og gættu um nóttina hjarðar sinnar.Og engill Drottins stóð hjá þeim, og dýrð Drottins ljómaði kringum þá. Þeir urðu mjög hræddir, en engillinn sagði við þá: Verið óhræddir, því sjá, ég boða yður mikinn fögnuð, sem veitast mun öllum lýðnum: Yður er í dag frelsari fæddur, sem er Kristur Drottinn, í borg Davíðs.Og hafið þetta til marks: Þér munuð finna ungbarn reifað og lagt í jötu.

Og í sömu svipan var með englinum fjöldi himneskra hersveita, sem lofuðu Guð og sögðu:

Dýrð sé Guði í upphæðum,
og friður á jörðu með mönnum,
sem hann hefur velþóknun á.