Hver er afstaða kirkjunar til Hvíldardagsins. Hvers vegna Sunnudagur en ekki Laugardagur eins og má lesa um í Biblíunni. Getur þu frætt mig um það?? :)

Ég þakka fyrir góð svör.
Kveðja Hólmfríður:)

Sæl Hólmfríður.
Þakka þér fyrir að spyrja.

Eins og þér er greinilega kunnugt hljóðar þriðja boðorðið þannig: Halda skaltu hvíldardaginn heilagan. Reyndar stendur í núgildandi þýðingu í 2. Mósebók 20.8:
Minnstu þess að halda hvíldardaginn heilagan.

Í sköpunarsögunni í 1.Mósebók 2. 2-3, segir svo: Guð lauk á hinum sjöunda degi verki sínu, er hann hafði gjört, og hvíldist hinn sjöunda dag af öllu verki sínu, er hann hafði gjört. Og Guð blessaði hinn sjöunda dag og helgaði hann, því að á honum hvíldist Guð af verki sínu, sem hann hafði skapað og gjört.

Hvíldardagurinn er líka kallaður sabbat.

Nokkur munur er á merkingu orðalagsins: Minnstu þess að... og Halda skalt þú. Ástæðan er sú að megináhersla gyðingdómsins er hvíldin. Það er í samræmi við lýsingu sköpunarsögunnnar um að Guð hvíldist þann dag. Þess vegna eru strangar reglur hjá gyðingum um það sem ekki má gera á hvíldardeginum, og mikil hætta er á að brjóta þær reglur. Það sem er sérstaklega fallegt í hefð gyðinganna og eftirbreytni vert er áherslan á sabbatsmáltíðina og það gildi sem hún hefur fyrir fjölskyldulífið.

Hin kristnu sem upphaflega héldu við hefðum gyðingdómsins, tóku strax upp þann sið að koma líka saman á sunnudeginum, á upprisudegi Drottins. Smátt og smátt varð sá siður ríkjandi. Ástæðan var kenningarlegs eðlis. Það var vegna þess að hin nýja sköpun sem braust fram í upprisu Jesú Krists frá dauðum tók við af hinni eldri sköpun sem sabbatshelgin minnti fyrst og fremst á.
Það er þess vegna sem Páll postuli skrifar í Kolossubréfinu:

... En Guð lífgaði yður ásamt honum, þegar hann fyrirgaf oss öll afbrotin. ... Enginn skyldi því dæma yður fyrir mat eða drykk eða það sem snertir hátíðir, tunglkomur eða hvíldardaga. (Kol. 2:13,16).

Með þessari áherslu varð líka breyting á innihaldi og merkingu hvíldardagsins, sem sunnudags. Það var ekki lengur hvíldin frá störfum vikunnar, sem var aðalatriðið heldur samveran um Guðs Orð, hin sameiginlega guðsþjónusta í nálægð Krists í Orði hans og altarisakramenti.

Orðalagsbreytinguna Minnstu þess að , sem verður Halda skaltu, má rekja til Marteins Lúther. Hann skýrði 3 boðorðið á þá lund að aðalatriði hvíldardagsins væri predikunin og Guðs Orð og guðsþjónusta safnaðarins sem á sér stað á sunnudeginum og verkar þaðan á allt lífið, alla daga vikunnar.

Þjóðkirkjan leggur mikla áherslu á að standa vörð um hvíldardaginn bæði sem dag tilbeiðslunnar, daginn þar sem Guðs Orð er haft um hönd og þar sem fjölskyldan er í fyrirrúmi.
Löggjafinn hefur kosið að standa vörð um helgi hvíldardagsins með sérstökum lögum þar um, þótt þess gæti sífellt í minna og minna mæli í samfélaginu. (Lög um helgidagafrið. Nr.32.1997)

Það segir kannski sína sögu að könnun sem gerð var í Þýskalandi 2004 sýndi að tveir þriðju allra þjóðverja töldu boðorðin tíu bindandi viðmið í lífi sínu, en aðeins 5% þeirra kunnu þriðja boðorðið!

Ég vona að þetta svari spurningu þinni.
Með bestu kveðjum, Kristján Valur