Hvað eru mörg sakramenti í lútherskri trú?

Sæll Ásgeir Helgi.

Sakramentin í lútherskri trú eru tvö, skírn og kvöldmáltíð. Orðið sakramenti merkir „leyndardómur“ það er í raun heilög athöfn, sem boðar okkur fagnaðarerindi og gefur okkur leyndar (ósýnilegar) gjafir.

Samkvæmt lúthersk - evangeliskum skilnningi þarf þrennt til þess að athöfn geti kallast sakramenti.

Í fyrsta lagi innsetningarorð Jesú
Í Mattheusarguðspjalli 28. 18-20 eru orð Jesú sem eru lesin við hverja skírn. Innsetningarorð heilagrar kvöldmáltíðar eru úr Mattheusarguðspjalli 26. 26-28 og í Lúkasarguðspjalli 22.19-20.

Í öðru lagi sýnilegt, jarðnesk efni: Í skírninni vatn og í kvöldmáltíðinni brauð og vín.

Í þriðja lagi fyrirheit um náð, andlega gjöf.: Í skírninni verðum við meðlimir í kirkju Krists og í kvöldmáltíðinni fáum við fyrirgefningu syndanna og samfélag við Guð, játum því að við þurfum á frelsara að halda minnumst þess sem Jesús gjörði fyrir okkur og þökkum það.

Þegar sakramenti er skýrgreint á þennan hátt er aðeins hægt að finna tvær athafnir sem uppfylla þessi skilyrði.

Með bestu kveðju,
Jóhanna I. Sigmarsdóttir