Hvers vegna geta konur ekki orðið biskupar ?

Sæl vertu Rut.
Takk fyrir spurninguna þína. Svarið getur verið mjög stutt, á þessa leið: Konur geta orðið biskupar í íslensku þjóðkirkjunni.
En svo ég hafi svarið aðeins ítarlegra þá eru rúm 30 ár liðin síðan fyrsta konan, sr. Auður Eir Vilhjálmsdóttir vígðist til prestsþjónustu á Íslandi. Það hafði reyndar verið heimild í lögum frá árinu 1911 en það reyndi ekki á það fyrr. Kona hefur einu sinni sóst eftir því að verða biskup Íslands en auk hennar voru þrír karlar. Þetta var árið 1997 þá varð núverandi biskup, herra Karl Sigurbjörnsson fyrir valinu. Kona hefur einnig sóst einu sinni eftir vísglubiskupsembætti á Hólum en þá var valinn núverandi vígslubiskup, Jón Aðalsteinn Baldvinsson. Konum fjölgaði hægt fyrstu árin í prestastéttinni en nú hefur orðið breyting þar á og konum fer fjölgandi. Það eykur væntanlega líkur á að kona vígist til biskups. Biskupsembættin í þjóðkirkjunni eru þrjú, biskupinn yfir Íslandi og svo tveir vígslubiskupar, í Skálholti og á Hólum.