Hvað er trúboð?

Er til skilgreining á því hvað er trúboð og hvernig það fer fram af hálfu Þjóðkirkjunnar?

Komdu sæll.

Orðið „trúboð“ eða „kristniboð“ er oft notað á íslensku yfir enska orðið „mission“ og samstofna orð á öðrum tungumálum. Orðstofninn þýðir í raun að vera sendur eða sendiför en merkingarsvið orðsins er mun víðtækara en íslensku orðanna. Jesús sendi lærisveina sína og hefur sent kirku sína með fagnaðarerindið um hann, náð og fyrirgefningu, út um allan heim, samanber kristniboðsskipun hans í Mt 28.18-20 þar sem segir m.a.: Farið því og gjörið allar þjóðir að lærisveinum, skírið þá í nafni föður, sonar og heilags anda. Jesús minnti einnig á að hann sjálfur var sendur af Guði föður inn í þennan heim og nú eru fylgjendur hans sendir út um heiminn.

Kristniboð byggir einnig á þeirri sannfæringu að Jesús sé vegurinn, sannleikurinn og lífið (Jh 14:6) og að ekki er hjálpræði í neinum öðrum. „Ekkert annað nafn er mönnum gefið um víðaveröld sem getur frelsað oss.“ (Post 4:12) Heimurinn þarf á Jesú Kristi að halda. Í þessari sannfæringu er mikilvægt að mæta fólki með virðingu og í kærleika. Enginn verður þvingaður til trúar og engan á að kaupa til trúar. Það þýðir að við þurfum að vera tilbúin að hlusta og keppa eftir því að flytja fagnaðarerindið þannig að það sé skilið og við því sé tekið. Þegar upp er staðið er það Heilagur andi sem kemur því verki til leiðar.

Oft eru notuð þessi tvö orð, kristniboð eða trúboð. Kristniboð er oft notað um boðun kirkjunnar í öðru samfélagi, þar sem farið er yfir mörk menningarsvæða til að segja fjarlægum þjóðum frá Jesú Kristi. Með hnattvæðingunni minnkar heimurinn og kemur til okkar í allri sinni breidd með nýja áskorun til kirkjunnar. Trúboð er oft notað um það sama, en af mörgum einskorðað við þýðingu á orðinu „evangelism“, sem er boðunarstarf í nánasta umhverfi. Íslensku orðin skýra sig sjálf: Að boða trú, að boða kristni. Kristniboð er sterkara og segir hvaða trú við boðum á tímum fjöltrúar. Um aðra boðun er ágætt að nota orðið boðunarstarf.

Þjóðkirkjan skilgreinir sig sem biðjandi, boðandi og þjónandi kirkju. Orð Guðs er boðað í guðsþjónustum, í barna- og æskulýðsstarfi, helgistundum - og reyndar á boðunin að umvefja og merkja allt starf kirkjunnar. Hún hefur það hlutverk hér í heimi að boða Jesú Krist og að vitna um kærleika hans. Þannig stundar þjóðkirkjan boðunarstarf eða trúboð hér heima. Eflaust mætti gera betur og leita nýrra leiða í að ná eyrum fólks með boðun trúarinnar. T.d. er fagnaðarerindið boðað hér á vefnum.

Þjóðkirkjan hefur ekki sinnt kristniboði í fjarlægum löngum formlega en það hefur Samband íslenskra kristniboðsfélaga (SÍK) gert. Vegna fámennis okkar er það góð lausn, frekar en að þjóðkirkjan sjálf fari að senda kristniboða til fjarlægra landa.

SÍK, sem stundum er kallað Kristniboðssambandið, er grasrótarsamtök sem hafa unnið innan þjóðkirkjunnar frá stofnun þess árið 1929. Þjóðkirkjan hefur stutt það starf með ýmsum hætti og einn sunnudagur ársins er helgaður kristniboðinu, kristniboðsdagurinn, sem er annar sunnudagur í nóvember. Þar er starfið kynnt, kallið til kristniboðs hljómar og safnað er fjárfamlögum til þess. Sumir söfnuðir og prófastsdæmi styrkja kristniboðsstarfið með fjárframlögum. Íslenskir kristniboðar hafa verið eða eru að störfum í Kína, Eþíópíu og Keníu.

Á vegum þjóðkirkjunnar starfar nefnd um kristniboð og hjálparstarf. Hlutverk hennar er m.a. að efla meðvitund um kristnboð innan safnaða þjóðkirkjunnar og minna á ábyrgð okkar í því efni. Kristniboð fellur undir kærleiksþjónustusvið biskupsstofu og er málaflokkur Ragnheiðar Sverrisdóttur djákna. Hun vinnur með nefndinni og í góðu samstarfi við SÍK.

Segja má að kristniboðhugsjónin sé ekki mjög sterk innan þjóðkirkjunnar en engu að síður vaxandi. Biskup Íslands hefur oft minnt á mikilvægi þess að einstaklingar og söfnuðir þjóðkirkjunnar styði við íslenskt kristniboðsstarf í ríkari mæli en gert hefur verið.

Kveðja,
Ragnar Gunnarsson