Góðan dag, ég er forvitinn um það hvort brúðkaup geti farið fram í kirkju án meiri athafnar, t.d. án þess að messa sé í leiðinni eða án gesta. Langar að hafa þetta sem einfaldast en þó síður að leita til sýslumanns.

Takk fyrir.

Takk fyrir spurninguna.

Hjónavígsla getur vissulega farið fram í kirkju án þess að messa sé haldin og án þess að gestir séu viðstaddir. Þó verða tveir vottar hið minnsta að vera á staðnum. Þannig að fámennasta mögulega hjónavígsla í kirkju fer fram að viðstöddum brúðhjónum, presti og tveimur vottum.

Hjónavígslan sjálf samanstendur síðan af ritningarlestrum og bænagjörð fyrir brúðhjónunum, auk spurninga og handsali sem eru nauðsynlegur hluti af löggerningi hjúskaparsáttmálans. Það fer síðan eftir óskum brúðhjóna í hverju tilviki hvort sálmasöngur eða annars konar kirkjuleg tónlist sé hluti af athöfninni.

Bestu kveðjur,
Kristín Þórunn Tómasdóttir