Sér Guð hvað við hugsum?

Komdu sæl/l

Kristnir menn játa trú á Guð föður, son og heilagan anda, Guð sem hefur bæði sögulegan bakgrunn meðal mannanna og er einnig stöðugt nálægur í fortíð, nútíð og framtíð. Í Biblíunni er að finna fjölmarga staði sem vitna um að Guð skynji hugsanir okkar. Bestu lýsinguna á því er að finna í 139. Davíðssálmi þar sem segir m.a.

„Hvort sem ég sit eða stend, þá veist þú það, þú skynjar hugrenningar mínar álengdar. Hvort sem ég geng eða ligg, þá athugar þú það, og alla vegu mína gjörþekkir þú.“

Aðrar tilvitnanir í Gamla testamentinu eru t.d í Sl. 94.11, Jes. 66.18.

Að auki er að finna margar sögur í guðspjöllunum um það hvernig Jesú þekkir hugsanir þeirra sem reyndu að koma höggi á hann. Kíktu t.d. á þessa texta:

En Jesús þekkti hugsanir þeirra og sagði: „Hví hugsið þér illt í hjörtum yðar?“ Mt. 9.4

En Jesús vissi hugsanir þeirra og sagði við þá: „Hvert það ríki, sem er sjálfu sér sundurþykkt, leggst í auðn, og hver sú borg eða heimili, sem er sjálfu sér sundurþykkt, fær ekki staðist.“ Mt. 12.25

En Jesús skynjaði gjörla hugsanir þeirra og sagði við þá: „Hvað hugsið þér í hjörtum yðar?“ Lk. 5.22

En hann vissi hugsanir þeirra og sagði við manninn með visnu höndina: „Statt upp, og kom hér fram“ Og hann stóð upp og kom. Lk. 6.8

Svo svarið við spurningunni er einfaldlega: Já, Guð sér hvað við hugsum. Hann skynjar tilfinningar okkar, hugsanir og gjörðir. Það gerir hann á jákvæðan hátt, ekki sem einhver sálnalögga, heldur eins og kærleiksríkt foreldri sem ber umhyggju fyrir barni sínu. Og það ætti að vekja okkur til umhugsunar um ábyrgð okkar hér í heimi, bæði gagnvart Guði en eins gagnvart náunga okkar.