Ég hef spurningu sem ég hef verið að velta fyrir mér soldið lengi...hver er líklegastur til að hafa verið besti vinur Jesús??

Komdu sæl.

Guðspjöllin greina ekki frá að einhver einn ákveðinn einstaklingur hafi verið besti vinur Jesú. Hins vegar er líklegt að þann vin hafi verið að finna í hópi lærisveina hans. Þrír úr hópi lærisveinanna, þeir Símon Pétur og Jakob og Jóhannes Sebedeussynir virðast hafa myndað nánasta vinahóp Jesú og verið með honum á flestum stórum stundum. Um tvo þessara manna langar mig aðeins ræða í örfáum orðum.

Annar þeirra er Símon Pétur, (hér eftir Pétur) sem var mjög ör og hvatvís sbr. Jóh. 18.10 þar sem hann brá sverði og hjó til þjóns æðsta prestsins og sneið af honum eyrað og Jesús ávítti hann í framhaldinu. Þrátt fyrir þetta frumhlaup og fleiri finnanleg þá hefur Jesús mikið traust á Pétri og finnur eflaust að í hjarta hans brennur mikil hugsjón. Þess vegna eftir upprisuna spyr Jesús Pétur þrem sinnum í Jóh. 21. 15-17 hvort hann elski sig og eftir hverja játningu Péturs biður hann Pétur um þrjú hlutverk sem öll eru keimlík. 1. Gæta lamba Jesú Krists. 2. Vera hirðir sauða hans. 3. Gæta sauða hans. Í Matt. 16. 13-19 er mjög svipað minni á ferðinni í samræðum Jesú og lærisveinanna sem eiga sér stað nokkru fyrir krossfestingu og upprisu hans. Þar spyr Jesús lærisveinana hvern þeir segja hann vera og Pétur svarar: ,,Þú ert Kristur, sonur hins lifanda Guðs." Í framhaldi af þessari játningu Péturs segir Jesús að Pétur verði kletturinn (gríska orðið petros þýðir klettur þannig að Pétur hét klettur og var klettur) sem hann muni byggja sína kirkju á.

Þetta rættist síðar eins og sagt er frá í 2. kafla Postulasögunnar þar sem Pétur heldur sína fyrstu kristniboðsræðu eftir að hafa fengið heilagan anda yfir sig og vitnaði um verk, dauða og upprisu Jesú Krists. Þar með var markað upphaf kirkjunnar og því var og er Pétur kletturinn sem kristin kirkja var reist á.

Framangreindir textar úr Jóhannesi og Matteusi sýna okkur að Jesús hafði mikið traust á Pétri og á milli þeirra hefur verið traust vinátta. Hins vegar þarf það ekki að þýða að Pétur hafi verið besti vinur Jesú en greinilega í þeim hópi.

Hinn lærisveinninn af þessum þremur líklegu bestu vinum Jesú er Jóhannes Sebedeusson, sem er af mörgum fræðimönnum talinn vera ,,lærisveinninn sem Jesús elskaði" (Jóh. 21.20) og einnig talinn vera sá sem skrifaði Jóhannsesarguðspjall. Í frásögn Jóhannesarguðspjalls af krossfestingunni segir frá því Jesús hafi talað af krossinum til Maríu móður sinnar og lærisveinsins sem hann elskaði. Sagði hann við móður sína að lærisveinninn elskaði yrði nú sonur hennar og við lærisveininn elskaða sagði hann að nú yrði María móðir hans. Í framhaldinu segir frá því lærisveinninn hafi frá þeirri stundu tekið Maríu heim til sín (sbr. Jóh. 19.25-27).

Þessi orð Jesú sem hann mælir í andarslitrum kvala og þjáninga á krossinum eru mikilvæg. Menn hugsa um allt það mikilvægasta, dýrmætasta og kærasta á ögurstundu. ellegar við dauðans dyr. Jesús hugsaði um móður sína og velferð hennar og hverjum treysti hann best fyrir velferð hennar en einmitt hinum elskaða lærisveini, sem var greinilega einn af hans bestu vinum ef ekki sá besti þó það sé hvergi sagt berum orðum.

Kveðja,
Magnús Magnússson
sóknarprestur í Ólafsvík