Eru til englar og getur Guð sent þá til hjálpar mönnunum?

Ég þakka fyrir þessa spurningu. Orðið engill merkir sendiboði, boðberi Guðs. Englar Guðs eru verkfæri vilja hans, flytja mönnum boð hans, vara við og vernda. Í Biblíunni koma englar oft við sögu, jólaenglana þekkjum við, engilinn sem birtist hirðunum í Betlehem og sagði þeim að frelsarinn væri fæddur. Og svo var allt í einu loftið fullt af englum sem sungu svo yndislega um dýrð Guðs í upphæðum og frið á jörðu og velþóknun yfir mönnunum.

Í Biblíunni koma englar þannig oft við sögu þegar stórtíðindi gerast. Engill birtist Maríu og sagði henni að hún ætti að fæða barn, Jesú, sem er Guðs sonur og frelsari heimsins. Engill huggaði Jesú þegar hann var í angist og ótta frammi fyrir krossinum. Englar birtust konunum sem komu að gröf Jesú og sögðu þeim að hann væri upprisinn. Í Postulasögunni er sagt frá því að engill bjargaði Pétri postula úr fangelsi. Og í síðustu bók Biblíunnar, Opinberunarbókinni, er sagt frá því hvernig englarnir syngja á himnum og lofa Guð.

Já, Guð getur sent engla sína til hjálpar mönnunum. Hann lætur verndarengla sína vaka yfir okkur á nótt sem degi. Það er mikilvægt að hryggja þá ekki né styggja. Englar Guðs eru yfirleitt ósýnilegir. En yfirleitt vill Guð nota gott fólk, góðar og hjálpfúsar manneskjur til að hjálpa, hugga og vernda og til að vitna um það að Guð er til og að hann ber umhyggju um okkur. Ég þykist vita að þið þekkið þess háttar manneskjur. Guði sé lof fyrir þær. Einhver sagði að við værum öll englar með einn væng. Og þess vegna getum við ekki flogið nema halda utan um hvert annað. Það er umhyggjan og kærleikurinn sem umfram allt vitnar um Guð og elsku hans.

Engill Drottins fylgi þér á öllum vegum þínum.

Karl Sigurbjörnsson