Eru tengsl milli trúar og tónlistar?

Komdu sæll.

Tónlist og trú hafa lengi átt samleið.

Í Sálmum Biblíunnar eru mörg dæmi um lofgjörð með söng, hljóðfæraleik og jafnvel dansi. Kristnir söfnuðir hafa allt frá upphafi notað tónlist við helgihald sitt, til að flytja og túlka texta, bænir og lofsöng. Hefðbundinn texti messunnar hefur í margar aldir verið viðfangsefni tónskálda, sem hafa klætt hann í margvíslegan búning. Allt frá því að siðbreytingin kom fram hafa sungnir sálmar verið mikilvægur þáttur í helgihaldi kristinna manna. Í ofangreindum dæmum eru tengsl á milli trúar og tónlistar augljós og algjör. Einnig er rétt að benda á að ýmiskonar hljóðfæratónlist án orða hefur verið samin til að túlka trúarlega tilfinningu eða reynslu. Þannig eru til ýmis hljóðfæraverk sem bera yfirskrift eins og t.d. "bæn", eða "hugleiðing" sem ætla má að hafa bein tengsl við trú.

Eitt mesta tónskáld sögunnar, Johann Sebastian Bach, skrifaði undir öll sín tónverk, hvort sem þau voru til notkunar í kirkju eða utan, S. D. G., sem er skammstöfun fyrir Soli Deo Gloria, "einum Guði til dýrðar". Þar er í mörgum tilfellum um tónlist að ræða, sem samin var í dansformi.

Þó sagt hafi verið að öll sönn list eigi sér sömu rætur í huga manns og trúin og að trúin og listin séu systur, er vissulega til mikið af tónlist, sem vegna innihalds texta eða samhengis sem hún er sett inn, sannarlega án tengsla við trú í hefðbundnum skilningi þess orðs.

Kveðja,
Hörður Áskelsson,
söngmálastjóri Þjóðkirkjunnar