Góðan dag

Getur manneskja sem ekki er skráð í Þjóðkirkjuna verið skírnarvottur barns míns? Viðkomandi hefur kristna trú og er skírð og fermd, en er ekki skráð í þjóðkirkju Íslands.

Bestu kveðjur
Laufey

Sæl, Laufey.

Hlutverk skírnarvotta/guðfeðgina er að bera skírninni vitni gagnvart Guði með því að biðja fyrir barninu og vera vitnisburður fyrir barnið með því að kenna því að biðja og vera því góð fyrirmynd að kristnu líferni. Mikilvægast er þess vegna að skírnarvottar játi kristna trú og séu sjálfir skírðir og helst fermdir. Skráning í trúfélag skiptir ekki öllu máli, enda erum við hluti hinnar kristnu stórfjölskyldu á heimsvísu og eigum að styrkja hvert annað í bæn og reynd.

Eðlilegt er samt að minnsta kosti einn skírnarvotta, helst tveir, tilheyri sömu kirkjudeild og barnið og foreldrar þess, til að styrkja tengslin við heimasöfnuðinn. Hafa ber í huga að skírnarvottar/guðfeðgin geta verið frá tveimur og upp í fimm. Ef annar en foreldri heldur á barni undir skírn er sá aðili líka skírnarvottur.

Ganig þér vel og Guð blessi barnið þitt,
María Ágústsdóttir.