Ef einhver lætur breyta nafni sínu hjá Þjóðskrá, er hann þá nokkuð skráður í lífsins bók þegar þar að kemur?

Komdu sæll.

Sem betur fer er um tvær mjög ólíkar skráningar að ræða. Lífsins bók er bók lambsins eins og talað er um í Opinberunarbókinni (Op. 21:27). Lambið er Kristur sjálfur, Guðs lambið sem ber burt syndir heimsins. Hann bar syndir okkar upp á kross og gaf líf sitt til lausnargjalds fyrir okkur. Trú á hann gefur okkur þá vissu, að eiga frelsun Guðs frá dauða til lífs og það líf er skráð í bók hans og með því sú fyrirgefning og sáluhjálp sem við þörfnumst. Þegar kemur að hinsta dómi og bók lífsins er dregin fram, er þar ekki aðeins þitt nafn skráð eða þitt lífshlaup, heldur milli síðanna það líf og sú frelsun sem Kristur gefur.

Við skírnina er beðið að nafn barnsins eða skírnarþegans sé skráð í lífsins bók. Þá er átt við að Guð þekkir og blessi einstaklinginn með nafni og með því er lögð áhersla á hið persónulega samband sem trú á Jesú Krist er. Guð þekkir okkur með nafni hvert og eitt og þó nafni sé breytt í þjóðskrá þá breytir það ekki þekkingu Guðs á okkur.

Lífsins bók tekur mið af lífinu og þeim breytingum sem hugsanlega verða á því. Textinn er ekki greyptur í stein, heldur lifandi texti í samræmi við hina lifandi trú. Hafi nafn þitt einu sinni verið skráð í lífsins bók þá þýðir það að þú ert skráður í hana, þú sem persóna. Við breytumst öll á einn eða annan hátt og sumir eins og þú bendir á, breyta líka nafni sínu. En náð Guðs og kærleikur er óbreytanlegur og það er það sem skiptir máli þegar kemur að bók lífsins. Þetta er orðað vel hjá Jesaja spámanni: „Grasið visnar, blómin fölna en orð Guðs vors varir að eilífu“ (Jes. 40:8) og eins segir Jesús í Matteusarguðspjalli: „Himinn og jörð munu líða undir lok en orð mín munu aldrei undir lok líða“ (Matt. 24:35). Það er orð Guðs sem lífsins bók byggir á og þess vegna getum við glaðst yfir því að vita okkur þar skráð hvernig svo sem lífið velkist með okkur.

Ég vona að þetta svari spurningu þinni

Bryndís Malla Elídóttir, héraðsprestur.