Góðan dag.

Okkur langar svo mikið að byrja að biðja borðbænir þegar fjölskyldan sest saman til málsverðar. Gætuð þið ekki bent mér á eitthvað slíkt?

Fyrirfram þökk,
Ólöf

Komdu sæl Ólöf.

Hér koma nokkrar bænir sem má nota við þetta tækifæri:

Allra augu vona á þig, Drottinn, og þú gefur þeim fæðu þeirra á réttum tíma. þú lýkur upp hendi þinni og seður allt, sem lifir, með blessun. Amen

Drottinn Guð, himneski faðir. Blessa þú oss og þessar gjafir þínar sem vér þiggjum af mildri miskunn þinni, fyrir Jesú Krist, Drottin vorn. Amen.

Gef oss í dag vort daglegt brauð
vor Drottinn Guð af þínum auð
vort líf og eign og bústað blessa
og blessa þú oss máltíð þessa.
Gef að við aldrei gleymum þér
Þá gjafa þinna njótum vér. Amen.

Á sunnudögum má nota þessa bæn:

Við tendrum helgarljós og biðjum um frið og ró, góða helgi öllum sem matast við þetta borð. Takk, góði Guð, fyrir vini og samfélag, vertu velkominn gestur í okkar hús.

Um jól gæti þessi hentað:

Við tendrum jólaljós og biðjum um fögnuð, frið og gleðileg jól öllum sem matast við þetta borð.
Kom, Jesú barn, til okkar inn með ljós þitt og kærleika.

Gangi ykkur vel,
Árni Svanur